ભગવાન બિરસા મુંડા જન્મજયંતિ અને જનજાતીય ગૌરવ દિવસની ઉજવણી

માનવ અધિકાર અને આંતરરાષ્ટ્રીય માનવિય કાયદા ભવન ખાતે 150મી જન્મજયંતિની વિશેષ ઉજવણી

સૌરાષ્ટ્ર યુનિવર્સિટીના માનવ અધિકાર અને આંતરરાષ્ટ્રીય માનવિય કાયદા ભવન ખાતે તા. 15 નવેમ્બર, 2025ના રોજ મહાન આદિવાસી જનનાયક અને સ્વાતંત્ર્ય સેનાની ધરતી આબા ભગવાન બિરસા મુંડાની જન્મજયંતિની ઉજવણી કરવામાં આવી હતી.

ભારત સરકાર દ્વારા ભગવાન બિરસા મુંડાની જન્મજયંતિને “જનજાતીય ગૌરવ દિવસ” તરીકે ઉજવવામાં આવે છે. આ દિવસ દેશના આદિવાસી સમાજના ગૌરવ, સંસ્કૃતિ, સંઘર્ષ, પરંપરા અને રાષ્ટ્રનિર્માણમાં તેમના મહત્વપૂર્ણ યોગદાનને યાદ કરવાનો અને નવી પેઢીને તેમાંથી પ્રેરણા મેળવવાનો મહત્વપૂર્ણ અવસર છે.

આ વર્ષે ભગવાન બિરસા મુંડાની 150મી જન્મજયંતિ હોવાથી ભવન ખાતે આ ઉજવણીનું વિશેષ આયોજન કરવામાં આવ્યું હતું. કાર્યક્રમ દરમિયાન ભવનના વિદ્યાર્થીઓ દ્વારા ભગવાન બિરસા મુંડાના જીવન, સંઘર્ષ, સામાજિક અને રાષ્ટ્રીય યોગદાન તેમજ આદિવાસી સમાજના અધિકારો માટે તેમણે કરેલા સંઘર્ષ અંગે માહિતીસભર વક્તવ્યો રજૂ કરવામાં આવ્યા હતા.

વિદ્યાર્થીઓએ પોતાના વક્તવ્યો દ્વારા ભગવાન બિરસા મુંડાના જીવન અને તેમના વિચારોને ઉજાગર કર્યા હતા. ખાસ કરીને આદિવાસી સમાજના અધિકારો, સ્વાભિમાન, સામાજિક ન્યાય અને શોષણ સામેના તેમના સંઘર્ષને યાદ કરવામાં આવ્યો હતો. તેમના જીવનમાંથી મળતી રાષ્ટ્રપ્રેમ, હિંમત, સંઘર્ષ અને સામાજિક ન્યાયની પ્રેરણાને વિદ્યાર્થીઓ સમક્ષ રજૂ કરવામાં આવી હતી.

કાર્યક્રમમાં ભવનના અધ્યક્ષ ડો. ભગીરથસિંહ માંજરિયા તેમજ ભવનના અન્ય અધ્યાપક અને સ્ટાફ સભ્યો ઉપસ્થિત રહ્યા હતા. તેમણે પણ ભગવાન બિરસા મુંડાના જીવન અને તેમના યોગદાનને યાદ કરી વિદ્યાર્થીઓને તેમના વિચારો અને સંઘર્ષમાંથી પ્રેરણા લેવા માટે પ્રોત્સાહિત કર્યા હતા.

જનજાતીય ગૌરવ દિવસની ઉજવણીનો મુખ્ય ઉદ્દેશ ભારતના આદિવાસી સમાજના ગૌરવપૂર્ણ ઇતિહાસ, સાંસ્કૃતિક વારસા અને રાષ્ટ્રના વિકાસમાં તેમના યોગદાન અંગે જાગૃતિ ફેલાવવાનો છે. ભવન ખાતે યોજાયેલ આ કાર્યક્રમ દ્વારા વિદ્યાર્થીઓમાં આદિવાસી અધિકારો, માનવ અધિકારો, સામાજિક ન્યાય અને સમાનતાના મૂલ્યો અંગે વધુ જાગૃતિ વિકસાવવાનો પ્રયાસ કરવામાં આવ્યો હતો.

ભગવાન બિરસા મુંડાની 150મી જન્મજયંતિ નિમિત્તે યોજાયેલ આ ઉજવણી દ્વારા ભવન દ્વારા તેમને શ્રદ્ધાપૂર્વક યાદ કરવામાં આવ્યા અને તેમના સંઘર્ષ તથા વિચારોને નવી પેઢી સુધી પહોંચાડવાનો મહત્વપૂર્ણ પ્રયાસ કરવામાં આવ્યો.

માનવ અધિકાર અને આંતરરાષ્ટ્રીય માનવિય કાયદા ભવન દ્વારા આ પ્રકારની શૈક્ષણિક અને જાગૃતિ આધારિત પ્રવૃત્તિઓના માધ્યમથી વિદ્યાર્થીઓમાં માનવ અધિકાર, સામાજિક ન્યાય, સમાનતા, બંધુત્વ અને રાષ્ટ્રીય જવાબદારીના મૂલ્યો વિકસાવવાનો સતત પ્રયાસ કરવામાં આવે છે.