બાબાસાહેબ ડૉ. બી. આર. આંબેડકર ચેર–સેન્ટર, સૌરાષ્ટ્ર યુનિવર્સિટી, રાજકોટ દ્વારા આયોજિત ડૉ. આંબેડકર મેમોરિયલ વ્યાખ્યાન શ્રેણી અંતર્ગત તા. ૨૦/૦૮/૨૦૨૬, ગુરુવારના રોજ અનુસ્નાતક ઇતિહાસ ભવન, સૌરાષ્ટ્ર યુનિવર્સિટી, રાજકોટ ખાતે “બંધારણથી બંધુતા સુધી: વિકસિત ભારતના શિલ્પી ડૉ. આંબેડકર” વિષય પર વિશેષ વ્યાખ્યાનનું આયોજન કરવામાં આવ્યું હતું.

આ કાર્યક્રમમાં વક્તા તરીકે ચેર–સેન્ટરના મુલાકાતી અધ્યાપક ડૉ. વિનેશ બામણિયા તથા ડૉ. રવિ બી. ધાનાણી, સંશોધન અધિકારી, બાબાસાહેબ ડૉ. બી. આર. આંબેડકર ચેર–સેન્ટર ઉપસ્થિત રહ્યા હતા.

• ડૉ. આંબેડકરના વિકસિત ભારતનું વિઝન : 

પોતાના વક્તવ્યમાં ડૉ. વિનેશ બામણિયાએ જણાવ્યું હતું કે ડૉ. આંબેડકરનું “વિકસિત ભારત”નું સ્વપ્ન માત્ર આર્થિક વિકાસ પૂરતું મર્યાદિત ન હતું, પરંતુ સામાજિક સમાનતા, શૈક્ષણિક જાગૃતિ, વ્યક્તિગત સ્વતંત્રતા, બંધુતા અને બંધારણીય નૈતિકતા પર આધારિત હતું. તેમણે કલારામ મંદિર સત્યાગ્રહ, ભારતીય બંધારણનું ઘડતર અને હિંદુ કોડ બિલ જેવા ઐતિહાસિક પ્રસંગોના સંદર્ભ સાથે ડૉ. આંબેડકરના સામાજિક અને રાષ્ટ્રનિર્માણના વિચારોને વિદ્યાર્થીઓ સમક્ષ વિસ્તૃત રીતે રજૂ કર્યા હતા.

તેમણે જણાવ્યું હતું કે વિકસિત ભારત–૨૦૪૭ના લક્ષ્યને સાકાર કરવા માટે આજના યુવાનોમાં શિક્ષણ, વૈજ્ઞાનિક દૃષ્ટિકોણ, સામાજિક જવાબદારી અને બંધારણીય મૂલ્યોનું સિંચન જરૂરી છે. ડૉ. આંબેડકરના “શિક્ષિત બનો, સંગઠિત રહો, સંઘર્ષ કરો”ના મંત્રને જીવનમાં ઉતારી યુવાનો રાષ્ટ્રના વિકાસમાં મહત્વપૂર્ણ યોગદાન આપી શકે છે.

• ચેર–સેન્ટરની પ્રવૃત્તિઓની માહિતી : 

આ પ્રસંગે બાબાસાહેબ ડૉ. બી. આર. આંબેડકર ચેર–સેન્ટરની કામગીરી અંગે માહિતી આપતાં ડૉ. રવિ બી. ધાનાણીએ જણાવ્યું હતું કે સૌરાષ્ટ્ર યુનિવર્સિટીમાં કાર્યરત ચેર–સેન્ટર દ્વારા ડૉ. આંબેડકરના જીવન, વિચારો, બંધારણીય દર્શન અને સામાજિક ન્યાયના વિવિધ પાસાઓને કેન્દ્રમાં રાખીને વિવિધ શૈક્ષણિક અને સંશોધનાત્મક પ્રવૃત્તિઓ કરવામાં આવે છે.

ચેર–સેન્ટર દ્વારા વ્યાખ્યાન શ્રેણી, સેમિનાર, વકૃત્વ સ્પર્ધા, નિબંધ સ્પર્ધા, સંશોધન ફેલોશીપ યોજના, પુસ્તક પ્રકાશન માટે આર્થિક સહાય યોજના સહિતની વિવિધ પ્રવૃત્તિઓનું આયોજન કરવામાં આવે છે. તેમણે વિદ્યાર્થીઓને ચેર–સેન્ટરની લાયબ્રેરી, સંશોધન સંસાધનો અને માર્ગદર્શનનો લાભ લઈ Ph.D. તથા અન્ય સંશોધનાત્મક અભ્યાસ માટે આગળ આવવા પ્રોત્સાહિત કર્યા હતા.

• ઉપસ્થિતિ

કાર્યક્રમમાં અનુસ્નાતક ઇતિહાસ ભવનના અધ્યક્ષશ્રી પ્રો. કલ્પાબહેન માણેક, અધ્યાપક ડૉ. કિશોરભાઈ જાદવ, ડૉ. જીતેશભાઈ સાંખટ, ડૉ. શૈલેશ લાવડીયા સહિત ઇતિહાસ ભવનના અધ્યાપકો અને મોટી સંખ્યામાં વિદ્યાર્થીઓ ઉપસ્થિત રહ્યા હતા.

ડૉ. આંબેડકરના બંધારણીય વિચારો, સામાજિક ન્યાય અને રાષ્ટ્રનિર્માણના દૃષ્ટિકોણને યુવા પેઢી સુધી પહોંચાડવાના હેતુથી આયોજિત આ વ્યાખ્યાન વિદ્યાર્થીઓ માટે જ્ઞાનવર્ધક અને પ્રેરણાદાયી બની રહ્યું હતું.

અંતે આભારવિધિ સાથે કાર્યક્રમનું સમાપન કરવામાં આવ્યું હતું.

સ્થળ: અનુસ્નાતક ઇતિહાસ ભવન, સૌરાષ્ટ્ર યુનિવર્સિટી, રાજકોટ

તારીખ: ૨૦ ઓગસ્ટ, ૨૦૨૬

https://www.facebook.com/share/p/1R4HCtnhSr/